01. apríl 2003 | 0 aths.
Í dag (1. apríl) féll ég fyrir aprílgabbi á vefnum. Það væri svo sem ekki í frásögur færandi nema fyrir það að hugmyndin að gabbinu kom frá mér sjálfum! Framkvæmdin var hins vegar með slíkum sóma að ég lét blekkjast. Meira um það síðar.
02. apríl 2003 | 0 aths.
Ég þorði ekki annað þegar ég fékk hótanabréfið frá innheimtumanni ríkissjóðs (sjá neðar) en að borga í panikkasti fyrir helgina. Hver veit nema eindaginn ógurlegi reyndist vera 1. apríl og hnéskeljarnar á mér yrðu brotnar í beinu framhaldi. Tók sénsinn og greiddi inn á reikning B (sjá enn neðar). Nú var ég að fá launaseðil og þar lætur innheimtumaður ríkissjóðs til skarar skríða og tekur þessar 98.438 af mér. Þar með er ég búinn að borga þær tvisvar. Jibbí. Og í ofanálag er enn dregið af mér í rangan lífeyrissjóð. Pirr.
04. apríl 2003 | 0 aths.
Aprílgabbinu sem ég nefndi áður er betur lýst hér á vef Más (en það fólst í því að hann lét sem léninu hans hefði verið stolið).
22. apríl 2003 | 0 aths.
Ég hef alltaf verið frekar grannur, en fyrir ári eða svo var kyrrsetan farin að segja fullmikið til sín og magavöðvarnir orðnir heldur framsettir. Ég ákvað því að reyna að gera eitthvað í málunum, varð aðeins meðvitaðri um það hvað ég borðaði og fór að hreyfa mig reglulega. Síðastliðið sumar hljóp ég einn, en í vetur var ég í samfloti með Langhlauparafélagi Reykjavíkur 1-2 sinnum í viku.
25. apríl 2003 | 0 aths.
Móðuramma mín lést skömmu fyrir páska. Vitað var að hverju stefndi og við bræður heimsóttum hana með mömmu á pálmasunnudag í síðasta sinn. Hún skildi svo við morguninn eftir. Kistulagning var síðasta vetrardag og var um leið ígildi jarðarfarar hér í höfuðborginni. Ég fór ekki vestur í Bolungarvík þar sem hún var jarðsett við hlið afa á annan sumardag. Þetta var fyrsta jarðarförin sem ég fer í. Má ekki líta á það sem vissa blessun? Ég væri að ljúga ef ég héldi því fram að ég hefði ekki meyrnað meðan á athöfninni stóð.