Ekki orð um fjölmiðlafrumvarpið

03. júní 2004 | 0 aths.

Eftir fund í ritstjórn thorarinn.com var ákveðið í leynilegri atkvæðagreiðslu að ekki verði minnst hér einu orði á fjölmiðlafrumvarpið og allt það havarí. Það verður eftirlátið öðrum.

Þess í stað verður sagt frá því að ritstjóri er á leið til heimahaganna yfir helgina.

Þórarinn afi hefði orðið 100 ára á laugardaginn og í tilefni af því verður efnt til samsætis í Valaskjálf. Ég verð að viðurkenna að ég er ekki með dagskrána alveg á hreinu, en þykist þó vita að sýndar verði gamlar myndir, rifjaðar upp sögur og eflaust eitthvað sungið, auk þess sem af þessu tilefni verða söfnum fyrir austan afhentir ýmsir munir sem voru í hans eigu.

Það stefnir í prýðilega mætingu ættarinnar og munum við fjórir frændur keyra austur á morgun (föstudag) í glymjandi rokki og galgopahúmor. Endurkoma áætluð á sunnudagskvöld.

Þessi mynd af afa var líklega tekin rétt fyrir 1960, því það sumar brann Alþýðuskólinn á Eiðum og þar með þessi skrifstofa og allt innbú þeirra hjóna.

Mitt framlag til undirbúningsins hefur m.a. verið að brjóta um lítinn fjórblöðung þar sem lífshlaupi afa er lýst í stuttu máli af föðursystkinum mínum.

Fyrir áhugasama er fjórblöðungurinn hér á pdf formi.