Vel heppnað grill

02. júlí 2004 | 0 aths.

Þorfinnur, Jón Heiðar, Már og Garpur komu í grillveislu í gær. Ég held að grillunin og boðið í heild hafi bara heppnast vel, a.m.k. var ég sáttur.

Það var yfirlýst stefna að vera bara með kjöt og grænmeti, þannig að ég grillaði kúrbít og helling af paprikum, ostfyllta sveppi og svínakjöt. Með þessu var hellingur af salati og köld piparsósa. Ég hafði hugsað mér að hressa upp á salatið með melónubitum, en melónan reyndist allt of sæt til þess og var því borðuð með ísnum í staðinn :)

Að ósk eins gestanna var leikur Tékka og Grikkja í sjónvarpinu, en það verður að segjast að sá leikur truflaði samkvæmið lítið, það litla sem ég sá útundan mér var líka alger hrútur.

Garpur var hins vegar í mun meira stuði heldur en leikmenn í Portúgal og grandskoðaði alla íbúðina, sér í lagi símasafnið og verkfærakistuna, auk þess að umraðaða hinu og þessu smálegu. Skemmtilegur strákur og upprennandi grúskari.

Nú er helgin að bresta á, fátt skipulagt nema auðvitað tónleikar á sunnudaginn - en ég hef enga trú á að ég þurfi að láta mér leiðast um helgina, enda verkefnalisti utanfara langur...