Mánuður liðinn

24. september 2004 | 0 aths.

Mér telst svo til að nú sé ég búinn að vera rétt rúman mánuð í útlandinu og e.t.v. rétt að taka saman stutta skýrslu.

Í stuttu máli hefur allt gengið að óskum (eða a.m.k. á vel viðunandi hátt). Ég er ágætlega sáttur við herbergið mitt (sér í lagi staðsetninguna) og sambúð okkar Andreas er með sóma. Ef yfirdýnufjárinn væri kominn væri húsgagnastatus orðinn góður.

Skólinn er spennandi og skemmtilegur. Það er auðvitað margt öðruvísi en ég á að venjast úr mínum háskólum til þessa, en það heyrist mér eiga við um flesta Danina líka. Það að hafa 5 daga "helgi" hefur kosti og galla - og reynir óneitanlega á sjálfsagann á köflum.

Danskan hefur ekki valdið teljandi vandræðum. Ég finn samt fyrir því í hópaverkefnum að ég er svolítið "fatlaður" þegar ég er hika og stama og reyni að koma því í orð sem ég ætla að segja. Danska talnakerfið hefur vafist fyrir mér, en það fer skánandi (ég er a.m.k. farinn að þekkja myntirnar í sundur án þess að þurfa að lesa á þær (yfirleitt)).

Veðrið hefur verið prýðilegt og heilsan góð (fyrir utan einn sólarhring í magapest).

Næsta verkefni er að reyna að koma mér upp sósíalneti, það að hanga einn heima á kvöldin og horfa á sjónvarpið eða lesa (sárasjaldan spila tölvuleiki) verður þreytandi til lengdar. Sem stendur er fredagsbarinn eini fasti félagslegi punkturinn, en ég ætla að róa svolítið í því að kynnast betur þeim skólafélögum mínum sem ég veit að búa í nágrenninu - prófa kannski að bjóða þeim heim í herbergið í te...

En nú var gestur dagsins, Sjöfn, að birtast. Ætla að sýna henni nágrennið og svo Fredagsbarinn og svo helgi framundan.