Tilveran til fyrra horfs

01. maí 2005 | 1 aths.

Ég veit ekki hvort færslurnar frá aðfaranótt föstudags báru keim af sjálfsvorkun, en það var ekki ætlunin. Fyrir utan tímabil um kvöldið/nóttina þar sem ég var verkefnalaus og hálfleiddist þá var þetta afskaplega sársaukalítið. Eftir annarlokin hafa flestallir í kringum mig haft á orði hvað það sé nú rosalegur léttir að vera búin að skila, þótt ég sé auðvitað fegin að þetta sé búið og hafi gegnið vel er ég ekki að finna fyrir þessum ógurlega létti.

Huxanlega er það vegna þess að þetta var "aldrei í hættu", ég var í góðum hópum sem unnu þetta skynsamlega og án óþarfa drama.

Svo er líka möguleiki að ég sé bara svona tilfinningalaus andskoti.

En það var indælt að hjóla heim í næturþokunni aðfaranótt föstudagsins og hlusta á fuglasönginn.

Á föstudagsmorgninum tókst mér að sofa til hádegis, þó með því að vakna í um klukkutíma um morguninn. Eftir hádegismat og skottúr í verslun rölti ég svo í skólann og skilaði rúmlega 300 blaðsíðna bunka af verkefnum. Spjallaði aðeins við Jens og Mark sem venju samkvæmt höfðu vakað alla nóttina og höfðu hvor um sig sofið ca. 4 tíma sólarhringana tvo þar á undan. Við skelltum okkur svo á barinn og létum fara vel um okkur.

Á barnum var góð stemmning og létt yfir mönnum. Augnlok sumra voru þó þung og það þynntist í hópnum þegar leið á daginn. Sjálfur lét ég tvo bjóra nægja áður en ég skipti yfir í gosið og lét mig svo hverfa um kvöldmatarleytið.

Heima fékk ég mér smá kríu, kvöldmat og rakstur. Eftir smá sjónvarpsgláp rölti ég svo aftur í skólann um miðnættið og kíkti á "fest" kvöldsins.

Þar var að mestu leyti annar mannskapur, enda kom mér ekki á óvart að ósofna fólkið sem var orðið drukkið fyrr um daginn hafði látið sig hverfa.

Það var því fámennt í "mínum" hópi, en í staðinn hengdi ég mig á Hjört og E-business klíkuna hans (einnig þekkt sem Borðtennisklúbburinn Sleikur) (löng saga).

Ég hafði nú ekki átt von á því að endast neitt sérlega lengi en svo fór að ég var til hálffimm, þegar geiminu var slúttað. Það var síðan heimilislegt að rölta heim í morgunbirtunni og leggjast til svefns í lesljósu herberginu. Alveg eins og íslenskt sumardjamm.

Mér tókst að sofa fram yfir hádegið að mestu samfellt og gladdist yfir því að vakna laus við þynnku (en óneitanlega örlítið slæptur eftir svefnbrengl).

Eftir að hafa glápt aðeins á lélegt sjónvarp dröslaðist ég með einn og hálfan hestsburð af óhreinum þvotti í myntþvottahúsið mitt og tók það svo rólega um kvöldið yfir Hellboy á DVD.

Nú er ég á leiðinni út í hressingargöngu og stefni á að kíkja með Aðalsteini á kaffihús seinnipartinn.

Á morgun byrjar svo fjögurra vikna verkefnið þar sem ég er búinn að fá stimplaða og vottaða undanþágu til að skrifa mína heimildarritgerð einn míns liðs.