Kaupti bækur

16. september 2005 | 2 aths.

Ég hef glettilega gaman af því að kaupa mér tæknibækur, liggur við að það sé hálfgert fetish hjá mér. Dagsdaglega treysti ég reyndar á vefinn um næstum allan fróðleik, en mér finnst ekkert jafnast á við það að hafa góða uppflettibók við höndina. Þetta rifjaðist upp fyrir mér í dag þegar ég stóð með tvær þykkar skruddur í bóksölu skólans og huxaði mér gott til glóðarinnar að hefja lestur.

Í þessu sambandi lít ég líka á t.d. hönnunarbækur sem tæknibækur, hvort sem það eru kennslubækur í hönnun eða bækur hugsaðar sem innblástur.

Ég held þá að ég sé búinn að kaupa þær bækur sem þarf vegna nýhafinnar annar, kaup dagsins voru:

• Observing the User Experience: A Practitioner's Guide for User Research
• Essential ActionScript 2.0

Sú fyrrnefnda er kennslubókin sem notuð er í Usability kúrsinum og þá síðari ætla ég að nota til að verða ógisslega góður að forrita í Flash. Þar er reyndar engin sérstök kennslubók, en þetta er sú bók sem kennarinn mælir með fyrir þá sem vilja leggja áherslu á forritunarhlutann. Ég held einmitt að ég vilji það.

Í dag leysti ég líka út hjólið mitt með nýjum lás - og á lægra verði en ég hafði reiknað með. Sömuleiðis keypti ég miða á árshátíð skólans sem verður eftir tvær vikur, og hver veit nema ég skelli mér á enn eina fjárfestinguna um helgina...

Eftir haustveður undanfarna daga er aftur komin sól með köflum - þótt aðeins hafi kólnað. Framundan er skottúr í nytjamarkað Hjálpræðishersins í leit að pottahlífum undir nýju blómin mín og eftir það liggur leiðin á Funky Fredagsbar.

Góða helgi.