Næsta helgi síðust
21. september 2006 | 2 aths.
Þá styttist í síðustu helgina mína í Köben. Það er ekki laust við að það sé skrýtin tilhugsun, en lífið gengur víst sinn vanagang og öllum tímabilum lýkur að lokum (sér í lagi gullaldartímabilum). Það verður kvöldverðarveisla hjá "frokostgruppen" af ITU annað kvöld, en helgin er að öðru leyti lítt skipulögð.
Á fimmtudag eftir viku treð ég mér með skóhorni í flugvél EasyJet og flýg til fundar við pabba og Sigmar í London (og missi þar með af Ella og Halldóru sem verða í Kaupmannahöfn sömu helgi). Þar ætlum við feðgar að spóka okkur í nokkra daga og kíkja á leik með Albert frænda.
(Albert frændi er sko ekki að fara að leika, heldur kemur hann með okkur á fótboltaleik.)
Þegar ég kem svo hingað aftur er ekkert að gera nema að bretta upp ermar, ég geri ráð fyrir að taka þriðjudag og miðvikudag í að pakka, fimmtudag í að koma dótinu til Samskipa og þrífa pleisið, á föstudagsmorgun er svo planið að skila af mér og bruna heim á klakann.
Ég hefði getað stílað inn á að vera þá helgi líka hér í Köben, en þótt það sé notalegt að sitja hér og horfa út í loftið er engin ástæða til að gera það að ævistarfi sínu - þá er alveg eins gott að koma sér heim og fara að stússast í að koma sér fyrir aftur á grandanum.
Flóamarkaðurinn
Það er sitthvað sem ekki fer með mér heim og ef einhver lesandi nennir að koma og ná í eitthvað af eftirtöldu dagana áður en ég fer er það guðvelkomið. Ég mun líklega skella upp auglýsingu hérna á kollegíinu líka, en annars hendi ég bara því sem út af stendur.
Til frjálsrar hirðingar:
- 18 gíra karlmannshjól úr Bilka, svolítið yfirborðsryð, en annars í góðu standi. Gírana þarf þó að stilla betur.
- Sjónvarpsborð úr Ikea.
- Lítið skrifborð, 100x60 cm, beykimynstrað með hvítum fótum úr IKEA.
- Hinn gríðarfagri Vestby fataskápur.
- Tveir klassískir stálstólar með fléttuðu baki og setu. (Glyttir í annan lengst til vinstri á þessari mynd.)
- Sérlega harðgerð pálmaplanta (hefur lifað af heilt ár í glugganum hjá mér, sést á myndinni sem vísað er á hér að ofan).
- 8 púnsbollar úr gleri, notaðir sem kertastjakar í ammælinu mínu.
- Eitthvað smálegt úr eldhúsinu; bollar, glös og þess háttar.
- Kannski læt ég krúttlega DVD spilarann minn ef gott boð berst.
Ef einhver hefur áhuga, endilega hnippið í mig.
Athugasemdir (2)
1.
Siggalára reit 25. september 2006:
Verðuru þá alkominn heim í Hugleikinn?
2.
Þórarinn sjálfur reit 25. september 2006:
Jamm, ég verð það. Hugleikinn sem sjaldan fyrr.
Útrætt mál
Lokað er fyrir athugasemdir eftir 30 daga.
Comments are closed for this entry