Spurning um nettengjara

27. september 2006 | 10 aths.

Nú er ekki nema rétt rúmlega vika í að ég komi heim og ég búinn að pakka fyrir helgi í London. Ég er aðeins byrjaður að kíkja á hvað þarf að græja þegar heim er komið og verð að viðurkenna að nettengimál flækjast aðeins fyrir mér.

Ég hef aðeins kíkt á vefi Símans, Hive, Og Vodafone (og einhverra minni spámanna) en þeir virðast passa sig á að vera aldrei að bjóða upp á alveg sambærilegan pakka við neinn hinna, þannig að samanburður er erfiður.

Það sem ég veit að ég þarf er:

• ADSL tenging með þráðlausum aðgangspunkti
• Heimasíma, þótt hann verði líklega lítið sem ekkert notaður
• GSM síma, er núna með Frelsisnúmer en mun færa það yfir í áskrift aftur

Meiri spurningamerki eru yfir:

• Tengihraða, ég veit ekki til þess að ég sé að fara að streyma til mín bíómyndum alveg á næstu misserum, og geri ekki ráð fyrir mörgum samtímanotendum, þannig að 1 MB/sek ætti í raun að vera alveg nóg (þ.e. ef það er alvöru hraði, ekki bara teoretískur).
• Gagnamagn. Ég hef ekki lagst í BitTorrent og félaga, en get þó ekki útilokað að það verði einhvern tíman. Núverandi notkunarmynstur mitt er vel undir 4 GB á mánuði (en það er á hægu kollegíneti). Væri kostur að geta aukið gagnamagnið ef þörf reynist fyrir hendi.
• ADSL sjónvarp. Ég er a.m.k. ekki að fara að kaupa áskrift að enska boltanum alveg strax, en mér skilst að on-demand dæmið hjá Skjánum sé prýðilegt. Held þó að sjónvarpstenging ætti ekki að vera deal-breaker (þ.e. skortur þar á).

Ég hef ekkert að gera við x netföng, vefsvæði eða slíkt, kann ágætlega við mig á mínum ameríska server.

Þannig að spurningin er svolítið um þjónustustig fyrirtækjanna, hvar maður er að fá öruggar tengingar og minnst bögg. Ég er heldur ekki alveg að átta mig á því hvaða möguleikar eru í því að prjóna saman þessar þrjár þjónustur (landlínu, GSM og ADSL), hvort það gefur afslætti eða hvernig þetta virkar í landi fákeppninnar.

Eru einhverjar ábendingar/frábendingar frá lesendum? Einhver sem treystir sér til að höggva á hnútinn?