thorarinn.com

Skakklappast á Fimmvörðuháls

22. júní 2007 | 2 aths.

Við Alex erum að fara með Útivist í jónsmessunæturgöngu yfir Fimmvörðuháls í nótt. Förum úr borginni með rútu klukkan sjö og ætli við verðum ekki búin að reima á okkur skó og bakpoka til að hefja klöngr milli tíu og ellefu.

Ætlunin er svo að skila sér í mörkina á laugardagsmorgni, finna tjaldið og reisa til þess að reyna að ná í verðskuldaða kríu.

Útivist grillar svo um kvöldið og rútan leggur af stað í borgina um hádegi á sunnudegi.

Veðurspáin gæti varla verið betri, helst að það stefni í að það verði óþægilega heitt að sofa í tjaldinu á laugardeginum.

Ég ætla að gerast svo djarfur að sleppa t.d. regnbuxunum og legg þeim mun meiri áherslu á að eiga nóg af nasli í nýja bakpokanum til að halda uppi blóðsykrinum (og halda mér vonandi með því vakandi).

Fögur fyrirheit um stíf útihlaup og esjugöngur til að byggja upp þrek og styrk hafa farið fyrir mun minna en til stóð.

Mér skilst þó á reynsluboltum að í þessum næturgöngum sé frekar kvartað yfir því að farið sé of hægt heldur en hratt, þannig að ég ætti að geta haldið í við hópinn.

Þetta verður a.m.k. spennandi upplifun.

En hvers vegna í andsk. þarf ég að vakna með vott af beinhimnubólgu í hægri leggnum akkúrat í dag? Það ætti þó vonandi að liðkast af mér.