Lagst í klámrannsóknarmennsku

18. ágúst 2007 | 3 aths.

Ætli það séu ekki að verða komnir hátt í átta mánuðir síðan kviknaði lítil hugmynd að einþáttungi í kollinum á mér. Í gær var sú hugmynd notuð sem afsökun fyrir því að hætta mér einn míns liðs í eina af fullorðinsleikfangabúllum miðbæjarins til að stunda þar háalvarlegar rannsóknir.

Afraksturinn varð nægilega fullnægjandi til þess að ég lét mér nægja að kíkja bara í eina búllu. Því telst mér svo til að þetta flokkist sem eigindleg rannsókn frekar en megindleg...

Ég er búinn að sækja mér handritaforrit og setja upp á makkanum eftir ábendingu á bloggi SigguLáru og því ekkert því til fyrirstöðu að hefja skrif og miðla af fenginni reynslu minni af heimsóknum í þennan menningarkima íslenska neyslusamfélagsins.

Lesendum er þó ráðlagt að halda ekki niðri í sér andanum í bið eftir að þessar rannsóknir skili sér í formi jólaleikrits Þjóðleikhússins, en vonandi text mér að koma þessu í sómasamlegan búning og lauma á einhverja einþáttungadagskrá Hugleiks.

Ég get þó ljóstrað því upp hér að líklega munu gíraffar koma við sögu í verkinu, sem og karamellukleinuhringir...

Að öðru leyti eru varir mínar innsiglaðar með tonnataki.