Juleferie

Þá er minns kominn í jólafrí.

Er det en kano du har i lommen eller er det dit projekt?

Ég náði að prenta út og gorma verkefnið í gærkvöldi og vatt mér inn á Eksamenskontoret rétt fyrir hádegið í dag. Þar stillti ég mér upp fyrir framan deskinn og mundaðist við að draga skýrslueintökin þrjú upp úr bakpokanum. Viðstaddar skrifstofudömur ráku upp stór augu, spurðu "Er det dit projekt?" og þegar ég kinkaði kolli við því voru þær einum rómi sammála um að það væri dejligt.

Sjálfur átti ég erfitt með að taka þátt í gleði þeirra yfir skilum þar horskriða ein ógurleg hafði ákveðið að taka bogr mitt yfir bakpokann sem merki um að láta lox undan aðdráttaraflinu og stefna til jarðar. Fyrir vikið var ég á linnulitlu innsogi um vinstri nösina og háði það fagnaðarlátum nokkuð.

Mér tókst þó að endurgjalda óskir um góð jól án þess að krydda þær með horleka (horláti?).

Heilsufar er annars mun betra en í gær. Ég er að vísu með nefrennsli og hnerra nokkuð reglulega, en hausinn er þokkalega skýr og hitaslæðingurinn sem ég hef grun um að ég hafi verið með seinnipartinn í gær virðist hafa hopað á ný.

Í þessum rituðum orðum hefur öllum jólagjöfum verið pakkað inn, klæði eru að mestu leyti komin í ferðatösku og aukataskan sem einungis verður með jólapökkum (og dúnúlpunni minni til bólstrunar) er að verða full.

Ég held að í jólagjöfinni til Vilborgar hafi ég náð nýjum lægðum í klúðurslegu innpökkunarbroti. Þó hef ég trú á að hún sé ekki að ergja sig yfir slíkum smámunum. Í staðinn skellti ég stóru V á pakkann og treysti á að hún fái sjálf að lesa á hann.

Merkispjaldárgangurinn 2005 verður vart færður í sögubækur. Enda kýs ég að fara minimalískar leiðir í ár og geri ekki aðrar kröfur en að hægt sé að leiða að því líkum hver viðtakandi og gefandi sé hverju sinni.

Síðustu gjöfinni var bjargað í hús rétt áðan. Sá leiðangur leiddi í ljós að úrvali geisladiskaverslana í Amager Center af engilsaxnesku gæða-indí-rokki verður lýst í einu orði: Ófullnægjandi.

Því var gripið til plans B, sem reyndar hafði ekki verið planað neitt sérstaklega fyrirfram en vakti hrifningu jólagjafanefndar þegar hugmyndinni skaut upp.

(Tímabundið) sambandsslit

Þetta jólafrí mun reyna nokkuð á tilfinningabönd. Ég hef ákveðið að slíta sambandi við aðila sem stendur mér kær, a.m.k. yfir jólin, en treysti á að hún taki mér fagnandi þegar ég kem aftur.

Þetta verður í fyrsta skipti í langan tíma sem ég ferðast milli landa án hennar og eflaust á ég eftir að sakna hennar.

En ég treysti á að komast á netið eftir öðrum leiðum og þannig kannski slá á mesta söknuðinn.

Það væri illt ef óprúttin varmenni næðu henni á vald sitt um jólin, en ég vonast til að kollegíið sé sæmilega traust athvarf, jafnvel þótt búast megi við að það verði að mestu mannlaust.

Ég vona bara að Surtla mín verði ekki einmanna meðan ég er í burtu, en hún hefur a.m.k. skjáinn og harða diskinn til að halda sér samneyti.

Syngjandi jólakveðjur

Þar sem ég geri ráð fyrir að þetta verði síðasta færslan mín fyrir jól þykir mér rétt að linka á eins og einn jólasöng. Lagið sjálft er reyndar ekki sérlega jólalegt, en útsetningin setur það í annan búning og ágætlega heppnaðan.

Má ég kynna: Þrjú hreindýr á palli.

Forspilið er svolítið langt, en sýnið biðlund þar til jólasveinninn birtist.

Og svo er komið nýtt myndband við uppáhalds söngleikjalagið mitt um Internetið. Flutt af karakterum úr World of Warcraft:

Vessgú.

Framundan

Nú eru ca. þrír tímar þar til ég legg af stað út á Kastrup, ég held það borgi sig að vera frekar fyrr í því en seinna. Í versta falli kem ég mér bara fyrir einhversstaðar með reyfara (ókeyptan) og iPodinn.

Annars er ekki loku fyrir það skotið að haldinn verði undirbúningsfundur mastersverkefnis á Kastrup. Emilie er að fljúga til London á sama tíma og ég, þannig að við tyllum okkur kannski niður ef við séum í stuði.

Þangað til ætla ég að reyna að koma skikki á próflestrargögn sem ég þarf að taka með heim um jólin - og kannski jafnvel huxanlega að reyna að lesa pínulítið...

En lesendum er hér með óskað árs og friðar.

Over and out.


< Fyrri færsla:
Hættur og kveblegur
Næsta færsla: >
Nýárskveðja thorarinn.com
 

Útrætt mál

Lokað er fyrir athugasemdir eftir 30 daga.

Comments are closed for this entry