thorarinn.com

Undirbúningur smundirbúningur

08. apríl 2006 | 3 aths.

Ég fékk lykla að lókalinu í gærkvöldi og skrifaði undir samning um réttindi mín og skyldur. Um hádegið kíkti ég svo niður til að byrja að rótast í mublum og átta mig á hvernig þetta verður allt saman.

Það kom strax í ljós að græjurnar niðri ráða ekki við brennda geisladiska, þannig að það verður iPodinn sem sér um að miðla tónlist kvöldsins, enda geisladiskasafnið mitt næstum allt í geymslu á Flyðrugrandanum.

Svo er ég búinn að fara í Netto og kaupa nokkra hestsburði af snakki og í Kvickly til að kaupa allt það sem ekki fékkst í Netto. Lokainnkaup dagsins verða svo bjórkassi úr Daglig Brugsen - svo ég þurfi ekki að drösla honum sérlega langt.

Nú er að fara að ryðja innkaupunum niður í kjallara og kæla bjórinn. Svo þarf ég líklega að skrifa einhver skilaboð á útidyrnar til að vísa gestum hvaða leið þeir eiga að fara til að komast í veislusalinn, en það er gengið inn í hann úr bakgarðinum.

Ég hef trú á að þetta verði hin besta skemmtan.

Svo er bara að endurtaka leikinn í vor þegar fleiri verða á svæðinu.