Með og móti

Ef ég ákveð að flytja heim í haust þyrfti ég helst að taka ákvörðun um það núna fyrir lok mánaðarins til að geta sagt leigjandanum mínum upp með þriggja mánaða fyrirvara og flutt inn í byrjun október.

Það fæli reyndar í sér töluvert span í september með skilum, prófi, útlandaskreppi og flutningum - en ég veit ekki hvort ég tími að taka enn einn launalausan mánuð og lifa bóhemalífi hér úti í október.

En til að gefa örlítinn nasaþef af því hvað ég sé sem kosti og galla við borgirnar tvær er hér smá samanburður á nokkrum atriðum sem mér þykja skipta máli:

KaupmannahöfnReykjavík
Vinir og kunningjar. Vinir, kunningjar, fjölskyldan og vitleysingarnir í Hugleik.
Allt óljóst með vinnu, vinnumarkaður í klárlegri uppsveiflu. Ýmsir vinnumöguleikar. Markaður í óljósum sveiflugangi.
Hægt að komast af án bíls. Virkilega erfitt að vera bíllaus.
Húsnæðismál óljós. Míns eigins íbúð.
Heilmikið menningarlíf sem ég hef ekki verið að nýta mér nægilega. Minna menningarlíf sem ég hef heldur ekki verið að nýta mér.
Ódýrari skyndibiti. Gasgrillið mitt.
Von um alvöru sumarveður. Lágu gráðurnar ekki alveg jafn naprar. Varla orð á sumri gerandi.
Frábært úrval og aðgengi að öli. Gæti (og hefur) verið verra. En samt...

Hvað af þessu vegur þyngst er erfitt að segja, en mikið hlakka ég í augnablikinu lítið til að fara að reka bíl í borginni.


< Fyrri færsla:
Tímabundið í gallabuxurnar
Næsta færsla: >
Freistandi danskrar fánu
 


Athugasemdir (5)

1.

Alex reit 14. júní 2006:

Sumum finnst nú samt spennandi að reka bíl.

2.

Óskar Örn reit 15. júní 2006:

Miðað við fyrri færslur þá hefur þú verið glæpsamlega latur við að nýta þér kúltúrinn í Köben og munt því varla sakna hans. Hér á klaka rignir áfram inn góðum konsertum og ég mun standa mig í að draga þig með mér á einhverja þeirra, sannaðu til!
Fór annars á Roger Waters á mánudaginn og kom mér bara á óvart hvað þetta var skemmtilegt. Vöknaði næstum því um augu þarna einu sinni eða tvisvar. Næstum því! Svo eru það Belle&Sebastian með Emiliönu Torrini í í júlí, útitónleikar með Sigur Rós í sumar og Nick Cave í sept. Allt að gerast!

3.

Örn Kristinsson reit 15. júní 2006:

Það verður því miður að staðfestast að veðrið hér er hreinasti viðbjóður.

4.

Sigmar reit 15. júní 2006:

Ánægður með að bjórinn komist á Topp 8 lista yfir hluti sem hafa áhrif á hvar þú verður næstu árin...

5.

Þórarinn sjálfur reit 15. júní 2006:

Alex: Til lukku með nýja bílinn ;)

Óskar: Já, ætli mig vanti ekki aðallega samverkamann í menningarneyslunni (lesist: einhvern til að draga mig af stað). Tek Roger Waters út á Hróarskeldu.

Örn: Samhryggist þjóðinni allri.

Sigmar: Ekki gleyma skyndibitanum!

Útrætt mál

Lokað er fyrir athugasemdir eftir 30 daga.

Comments are closed for this entry