thorarinn.com

The falling man

10. september 2006 | 2 aths.

Í Mogganum í dag segir um heimildarmyndina "Í frjálsu falli" (The falling man):

Bresk heimildamynd. Í kjölfar hryðjuverkanna í Bandaríkjunum 11. september 2001 birtist ljósmynd af manni sem hafði stokkið niður úr turni World Trade Center. Myndin birtist á forsíðum heimspressunnar degi síðar, en hefur vart sést síðan. Þessi heimildamynd fjallar um ljósmyndarann.

Og ofar á dagskrársíðunni er klásúlan:

Ný bresk heimildamynd í Sjónvarpinu kl. 22.15 sem fjallar um ljósmyndara sem lagði líf sitt í hættu er hann tók ógleymanlega ljósmynd af manni sem hafði stokkið niður úr turni World Trade Center.

Lox segir frumheimildin á vef RÚV:

Ný bresk heimildamynd. Í kjölfar hryðjuverkanna í Bandaríkjunum 11. september 2001 birtist ógleymanleg ljósmynd af manni sem hafði stokkið niður úr turni World Trade Center. Myndin birtist á forsíðum heimspressunnar degi síðar, en hefur vart sést síðan. Þessi heimildamynd fjallar um ljósmyndarann sem lagði líf sitt í hættu á þessum örlagaríka degi.

Uuu... nei.

Nú get ég fyllilega mælt með þessari mynd, enda horfði ég á hana í gærkvöldi, hún er bæði vel sett fram og veitir "nýja" innsýn í það sem gerðist þennan dag, auk þess að sýna nokkrar af þeim manneskjum sem lentu í þessum hremmingum.

En myndin fjallar ekki um ljósmyndarann og það kemur hvergi fram í henni að hann hafi lagt líf sitt í hættu við að taka myndina. Hann var í nokkuð öruggri fjarlægð og ekki í meiri hættu en aðrir sjónarvottar á Manhattan þennan dag.

Heimildarmyndin fjallar þess í stað um ljósmyndina sjálfa, hvað hún segir um atburðina, þau sterku viðbrögð sem hún olli og vangaveltur um það hvers vegna hún var bara birt einu sinni og hvarf svo af síðum blaðanna. Það er talað við ljósmyndarann, aðstandendur þeirra sem lentu í árásinni og blaðamenn sem reyndu að komast að því hver maðurinn væri og hver saga hans væri. Ljósmyndarinn er hins vegar bara ein af þeim persónum sem rætt er við.

En myndinni er hægt að mæla með, þótt hún hristi auðvitað upp í manni með því að fjalla um óþægilega atburði og spyrja hinnar óþægilegu spurningar: Hefðir þú stokkið eða ekki?