thorarinn.com

Bitinn aftan hægra

07. október 2005 | 3 aths.

Enn hefur ekki borið á auknum innrásarþunga silfurskottufjölskyldunnar í baðherberginu og enn hef ég ekki staðið þær að því að narta í mig (enda skilst mér að það sé lítt í þeirra eðli). Hins vegar hefur eitthvað kvikt bitið mig í hælinn, auk þess sem ég er reglulega að bíta sjálfan mig - mér til lítillar gleði.

Í fyrradag uppgötvaði ég það sem lítur út eins og flóarbit rétt fyrir ofan hælinn á hægri fæti. Nú er veður enn með nokkrum ágætum hér í veldi danadrottningar (og einstaka bauni sést á stuttbuxum) en sjálfur hef ég mest lítið verið á ferli berfættur. Þetta bit finnst mér því líklegast að ég hafi fengið í svefni, en hef hvorki orðið var við bitlegar flugur né flær hér á heimilinu.

Maður þarf að minnsta kosti ekki að upplifa sig einmanna með svona fjörugt dýralíf í kringum sig...

Verst hvað bitinu líkar illa við skó, það er kvöl og pína að ganga þótt ekki sé nema stuttar vegalengdir. Verður fróðlegt að sjá hvernig kláðinn verður í fótboltanum á morgun.

Fyrr í dag beit ég svo af alefli í innanverða vörina á mér, á stað sem ég er búinn að bíta ítrekað í upp á síðkastið. Eins og verða vill með sár í munni bólgnar það aðeins og þar með aukast líkurnar á að ég bíti í það aftur. Pirrandi.

Af drykkju(m)

Á morgun verður Tour de Chambre hér á hæðinni. Samkvæmt laganna hljóðan eiga þá allir gangbúar eftir að drekka a.m.k. 12 áfenga drykki áður en kvöldið er úti (12 herbergi hafa boðað þátttöku). Ég er ekki alveg að sjá að hænuhausinn ég standi undir því magni...

Mér sýnist ljóst að íslenskt brennivín er ekki boðið til sölu í sérverslunum áfengis hér á Amager og hef ekki gert mér ferð upp á meginlandið til að leita þar. Það verður því boðið upp á einhverskonar bolluafbrigði hjá mér.

Annars hefði maður haldið að það gæti verið góður bissniss í því að selja íslenskt brennivín hér í Köben, viðskiptamannahópurinn ætti a.m.k. að vera nógu stór.

Í gær var haldin smá drykkjuæfing á fimmtudagsbarnum, áfram verður æft í kvöld og svo spurt að leikslokum á laugardagskvöldið.

Ef ekki heyrist frá mér aftur í bráð hef ég líklega verið lagður einhversstaðar inn með áfengiseitrun.

Skál.